Молебное пение во время губительнаго поветрия и смертоносныя заразы
Благословен Бог наш, всегда, ныне и присно, и во веки веков.
Лик: Аминь.
Диакон: Слава Тебе, Боже наш, слава Тебе.
Клир поет: Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Таже чтец:
Святый Боже, Святый Крепкий, Святый Безсмертный, помилуй нас. Трижды.
Слава, и ныне:
Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. Трижды
Слава, и ныне:
Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.
Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.
Чтец: Аминь.
Господи, помилуй, 12 (раз).
Слава, и ныне:
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем самому Христу, Цареви и Богу нашему.
И псалом 37
Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася, и сташа. И ближнии мои отдалече мене сташа, и нуждахуся ищущии душу мою: и ищущии злая мне глаголаху суетная, и льстивным весь день поучахуся. Аз же яко глух не слышах, и яко нем не отверзаяй уст своих, И бых яко человек не слышай, и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая воз благая оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.
(Или псалом 90
Живый в помощи Вышняго, в крове Бога Небеснаго водворится, Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна: Плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тьма одесную тебе, к тебе же не приближится: Обаче очима твоима смотриши, и воздаяние грешников узриши. Яко Ты, Господи, упование мое: Вышняго положил еси прибежище твое. Не приидет к тебе зло, и рана не приближится телеси твоему: Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою: На аспида и василиска наступиши, и попереши льва и змия. Яко на Мя упова и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его: Долготою дней исполню его и явлю ему спасение Мое.)
Слава, и ныне: Аллилуия, аллилуия, аллилуия, слава Тебе, Боже. Трижды
Посем диакон глаголет ектению великую:
Миром Господу помолимся.
Лик: Господи, помилуй.
О свышнем мире, и спасении душ наших, Господу помолимся.
Лик: Господи, помилуй.
О мире всего мира, благостоянии святых Божиих церквей и соединении всех, Господу помолимся.
Лик: Господи, помилуй.
О святем храме сем и с верою, благоговением и страхом Божиим входящих вонь, Господу помолимся.
Лик: Господи, помилуй.
О Великом Господине и отце нашем Святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, честнем пресвитерстве, во Христе диаконстве, о всем причте и людех, Господу помолимся.
Лик: Господи, помилуй.
О Богохранимей стране нашей, властех и воинстве ея, Господу помолимся.
Лик: Господи, помилуй.
О граде сем (или: о веси сей, или о святей обители сей), всяком граде, стране и верою живущих в них, Господу помолимся.
Лик: Господи, помилуй.
О благорастворении воздухов, о изобилии плодов земных и временех мирных, Господу помолимся.
Лик: Господи, помилуй.
О плавающих, путешествующих, недугующих, страждущих, плененных и о спасении их, Господу помолимся.
Лик: Господи, помилуй.
И абие прилагается сия:
О еже не помянути беззаконий и соблазнов нас, грешных и недостойных рабов Своих, но милостивно очистити грехи наша, и отвратити гнев Свой, праведно движимый на ны, Господу помолимся.
Лик: Господи, помилуй.
О еже не яростию Своею обличити, ниже гневом наказати нас, но помянути, яко плоть есмы, дух ходяй и не обращаяйся, и милостивно пощадити от смерти души наша, Господу помолимся.
Лик: Господи, помилуй.
О еже не внити в суд с рабы Своими, и не назрити беззакония наша, но очистити я, и милостиву быти, и пощадити люди согрешшия, Господу помолимся.
Лик: Господи, помилуй.
О еже помянути щедроты и милости Своя, яко от века суть, грехов же юности и неведения нашего не помянути, и помиловати нас, Господу помолимся.
Лик: Господи, помилуй.
О еже услышати от храма Святаго Своего глас наш, и исцелити болезни смертныя, одержащия нас, и потоки беззакония, смутившия нас, изсушити, Господу помолимся.
Лик: Господи, помилуй.
О еже вскоре изъяти нас от сетей смертных, и от болезней адовых избавити, Господу помолимся.
Лик: Господи, помилуй.
О еже милостивно продолжити рабом Своим покаяния время, и не безгодно, яко неплодную смоковницу, посещи, но благосердием окопати, и милосердия росою напоити, плодов покаяния и обращения нашего человеколюбно еще ожидая, Господу помолимся.
Лик: Господи, помилуй.
О еже вознести нас от врат смертных, и меч изъятый, и лук Свой напряженный, и в нем сосуды смертныя, на ны праведно уготованныя со стрелами горящими, милостивно (да не погибнем) от нас отвратити, Господу помолимся.
Лик: Господи, помилуй.
О еже услышати молитву нашу, и моление наше внушити, и слез наших не премолчати, но ослабити нам, да почием прежде даже не отъидем, и ктому не будем, Господу помолимся.
Лик: Господи, помилуй.
О избавитися нам от всякия скорби, гнева и нужды, Господу помолимся.
Лик: Господи, помилуй.
Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Священник возглас:
Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.
Лик: Аминь.
И абие диакон глаголет во глас 2:
Бог Господь, и явися нам, благословен грядый во имя Господне.
Стих 1: Исповедайтеся Господеви, яко Благ, яко во веки милость Его.
Стих 2: Обышедше обыдоша мя, и именем Господним противляхся им.
Стих 3: Не умру, но жив буду, и повем дела Господня.
Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.
Лик же поет: Бог Господь: к коемуждо стиху, во глас 2.
Таже тропарь, глас 2::
Во гневе Твоем, Боже, помяни щедроты Твоя, прах бо и пепел есмы, дух ходяй и не обращаяйся, и не яростию Твоею обличи нас, да не погибнем до конца, но пощади души наша, яко един Милосерд. Дважды.
Слава, и ныне, Богородичен, глас 4:
Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех и в болезнех обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.
Таже п салом 50
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.
Канон Пречистей и Единосущней и Животворящей, неразделимей Троице, и ко всем святым , без ирмосов. Глас 8
Песнь 1
Ирмос: Колесницегонителя фараоня:
Вседетельная, и Срасленая, и Сопрестольная, и Единосильная, и Трисветлая Славо, Отче Непостижиме, Сыне и Душе Святый, лютыя болезни рабы Твоя свободи, яко да благодарственно Тя славим.
Грехов буря изрину мя в глубину немощи, и частыя болезни, якоже треволнение мя обуревают окаяннаго: Единосильная Державо, Троице Святая, умилосердися, и спаси мя люте погибающа.
Слава: О содержащаго греза избави, Троице нераздельная, нас Твоя рабы, росою милости Твоея угашающи зной лютых моих болезней, и здравие подающи, яко да православно воспеваем Тя.
И ныне, Богородичен: Избавителя и Вседетеля и Господа во чреве носившая, наша недуги, Всечистая, понесшаго: Того убо моли лютыя немощи Твоя рабы избавити, едина человеков Помоще.
Песнь 3
Ирмос: Небеснаго круга Верхотворче Господи:
Небеснии умове, ангельския чины, Престоли, и Начала, и Силы, и Господьства, молят Тя, Благаго и Спаса: губительнаго свободи недуга рабы Твоя.
Да человеколюбия на мнозе, Владыко, Твоего покажеши бездну, Всесильне, недуга свободи смертоноснаго, и болезней лютых рабы Твоя, Едине Долготерпеливе.
Слава: Яко Божии предстоятели, служебнии дуси, Ангелы и Архангелы, Сего молите, утолити недуг, разорити печаль, смертоносныя же части избавити.
И ныне: Исцелений источника Тя благих показа, бездна из Тебе прошедшая, Христос Господь, Отроковице Пренепорочная, темже рабы Твоя избави, немощи бурею потопляемых.
Таже:
Избави от бед рабы Твоя, Многомилостиве, яко мы усердно к Тебе прибегаем, к милостивому Избавителю, всех Владыце, в Троице славимому Богу.
Посем ектения сугубая:
Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй,. трижды
Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.
Лик: Господи, помилуй, трижды.
Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.
Лик: Господи, помилуй, трижды.
Еще молимся за всю братию и за вся христианы.
Лик: Господи, помилуй, трижды.
Священник возглас:
Яко милостив и Человеколюбец Бог еси, и Тебе славу возсылаев, Отцу, и Сыну, и Святому Духу, ныне и присно, и во веки веков.
Лик: Аминь.
Таже седален, глас 2:
Не отрини до конца согрешшия люди Твоя, Владыко, ниже остави милости и щедроты Твоя о нас, но яко бездна сый щедрот и милосердия пучина, приими мольбы наша, и избави нас от належащия беды и нужды, Един бо еси благоуветливый.
Песнь 4:
Ирмос: Ты моя крепость, Господи:
Ныне сень воистинну смертная обыде, и ко адовым вратом приближи, но Ты, Спасе, яко силен, нас возставивый, удиви милости Твоя, спасаяй в вере несумненной вопиющих: сле Твоей слава, Человеколюбче.
Христовы таинницы, самовидцы и проповедницы, приимшии дар исцеления, и врачеве суще душевнии, о нужде мя, Апостоли, изведите содержащаго недуга, Иисуса моляще Владыку, и Избавителя, и Господа.
Слава: Грехов буря ныне нас постиже, немощи волны обуревают, болезни погружают частыя: скорби бо и болезни нас окаянных обретоша. Апостоли Господни, вашими мольбами, помощи руку подайте.
И ныне, Богородичен: Болезньми лютыми и частыми ударяеми, Дево, вси Тебе припадаем: державным покровом Твоим, Чистая, спаси нас всех, ущедри, Богоневестная, избави мора, и лютыя немощи, и болезни исцели, Владычице.
Песнь 5
Ирмос: Вскую мя отринул еси:
Моря прелести, медоточными вашими моленьми, священнии пророцы потопивше, ныне преложите горесть всю губительныя нынешния немощи, на божественную благомощия сладость.
Пронзени быхом стрелами немощи, повелением Твоим, Господи, и утвердися на нас рука Твоя, Всесильне: яко Бог Щедрый, ущедри всех Твоею милостию, молитвами святых мучеников Твоих.
Слава: Сына якоже древле сына вдовича возставил еси, Твоим повелением, умерщвлена, Слове, лютыя немощи рабы Твоя, яко един Благ и Милостив, избавивый, оживотвори, едине Человеколюбче.
И ныне, Богородичен: В нощи житейстей буря постиже всякаго озлобления, покрыло мя, Дево, немощи омрачение, но возсияй ми прохлаждения, Пречистая, свет, и к свету благомощия настави.
Песнь 6
Ирмос: Очисти мя, Спасе:
В пучине пропасти и немощей облежим, губительныя напасти обуревают волны, Правителю Господи, помощи руку простер ныне, спаси.
Расслабленнаго якоже древле стягнул еси, Божественным манием от недуга болезненнаго, и одра озлобления, и от недуга тяжчайшаго, ущедрив даждь здравие, Многомилостиве.
Слава: Пророческий лик, Апостолов собрание, полк страдальцев ныне молит Тя, едине Многомилостиве, о людех Твоих, Блаже, сих ущедри.
И ныне, Богородичен: Марие, чистое девства Сокровище, Ты очисти нас, и недугов, и скорбей, и содержащия ныне немощи избави, да верою Тя прославим.
Таже:
Избави от бед рабы Твоя, Многомилостиве, яко мы усердно к Тебе прибегаем, к милостивому Избавителю, всех Владыце, в Троице славимому Богу.
Диакон глаголет ектению малую:
Паки и паки миром Господу помолимся.
Лик: Господи, помилуй.
Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Священник возглас:
Ты бо еси Царь мира, и Спас дущ наших: и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
И по возгласе кондак, глас 6:
Болезни адовы обыдоша нас, и прикры ны сень смертная, и яко воск от огня, дние наши тают от лица гнева Твоего, Господи, но яко Щедр во гневе милости помяни, и пощади люди Твоя, да живи суще, в покаянии славим Тя единаго Человеколюбца.
Диакон: Вонмем, Премудрость, вонмем.
Чтец: Прокимен, глас 4: Господи, да не яростию Твоею обличиши мене, ниже гневом Твоим накажеши мене.
Стих: Яко стрелы Твоя унзоша во мне, и утвердил еси на мне руку Твою.
Диакон: Премудрость.
Чтец: Ко Евреем постания святаго Апостала Павла чтение.
Диакон: Вонмем.
Апостол ко Евреем (зачало 331 от полу)
Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец; Аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отца имехом наказатели, и срамляхомся: не много ли паче повинемся Отцу духовом, и живи будем; Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.
Священник: Мир ти.
Чтец: И духови твоему.
Аллилуия, гласа
Стих 1: Одержаша мя болезни смертныя, и потоцы беззакония смятоша мя.
Стих 2: Болезни адовы обыдоша мя, предвариша мя сети смертныя.
Диакон: И о сподобитися нам слышанию Святаго Евангелия, Господа Бога молим.
Лик: Господи, помилуй, трижды.
Диакон: Премудрость, прости, услышим Святаго Евангелия.
Священник: Мир всем.
Лик: И духови твоему.
Священник: От Луки Святаго Евангелия чтение.
Лик: Слава Тебе, Господи, слава Тебе.
Диакон: Вонмем.
Евангелие от Луки (зачало 16)
Во время оно, вниде Иисус в дом Симонов, теща же Симонова бе одержима огнем велиим, и молиша Его о ней. И став над нею, запрети огню, и остави ю: абие же воставши служаше им. Заходящу же солнцу, вси елицы имеяху болящия недуги различными, привождаху их к Нему: Он же на едином коегождо их руце возлож, исцеляше их. Исхождаху же и беси от многих, вопиюще и глаголюще: яко Ты еси Христос Сын Божий. И запрещая не даяше им глаголати, яко ведяху Христа Самого суща. Бывшу же дни изшед иде в пусто место: и народи искаху Его, и приидоша до Него, и держахуся Его, да не бы отшел от них. Он же рече к ним: яко и другим градовом благовестити Ми подобает Царствие Божие, яко на се послан есмь. И бе проповедая на сонмищах Галилейских.
Лик: Слава Тебе, Господи, слава Тебе.
Песнь 7
Ирмос: Божия снизхождения:
Опаляет пещь безмерных болезней, и сжигает мя огневицы губительныя пламень непрестанно безстуднейший, но росою милости Твоея, Спасе, прохлади поюща: благословен Бог отец наших.
Пророцы, Апостоли, мучеников собори, божественнии учителие, болезни недугующих нас мольбами укротите, и здравие даруйте поющим: благословен Бог отец наших.
Слава: Словом Лазаря воскресивый, ныне яко из гроба нас лютыя немощи возставивый, оживи, Господи, да вопием песнь благодарственную: благословен Бог отец наших.
И ныне, Богородичен: Щедра сущая, и Мати Всещедраго, ущедривши избави Твоя люди, призывающия милости Твоя, Дево, и поющия: благословен Бог отец наших.
Песнь 8
Ирмос: Седмерицею пещь:
Болезненно стенем, от одра болезни нашея, и от губительныя немощи, вопием к Тебе Человеколюбцу, сердечныя очи ныне простирающе, здравия просим. Посети нас, Спасе, и возстави пети: людие, превозносите во вся веки.
В нашу немощь милостивне облекийся, и уподобитися человеком изволивый, молитвами преподобных Твоих, отчаянных спаси нас, воздвигни из гроба отчаяния пети: отроцы, благословите, священницы, пойте, людие, превозносите во вся веки.
Слава: Содетелю естества, Подателю исцеления, утробы щедрот и благоутробия пучину яко имеяй, Долготерпеливе, посещением посети от губительныя немощи люди Твоя и оживи вопити: священницы, воспойте, людие, превозносите во вся веки.
И ныне, Богородичен: Крепкая Помоще и известное Заступление, отчаявшихся Надежде, Пренепорочная, посети страждущия болезненно рабы Твоя, облегчи тяжесть горькия немощи, отжени недуг губительныя нужди, и спаси рабы Твоя, Дево Богородице.
Песнь 9
Ирмос: Ужасеся о сем небо:
Чудеса велия, ихже несть числа, сотворивый Безсмертне, на рабы Твоя милости Твоя, Боже, яко Милостив покажи, и содержащия нас ныне свободи болезни, моленьми рождшия Тя, и лика страстотерпцев Твоих.
Ангелов, Архангелов и пророков, Апостолов, мучеников, преподобных же, иерархов, священномучеников Твоих молитвами, плач рабов Твоих обрати, Всесильне, в радость: исцели болезнь, облегчи недуги, и здравие нам даруй.
Слава: Душ же и телес Врача, в милости богатаго Господа Тебе молю: исцели страсти моя многия, болезней измени и скорбных мя, яко Благ и един Благодетель, и спасай верою чистою Тя величающих.
И ныне, Богородичен: Щедраго рождшая и Милостиваго, и Владыку, и Создателя, и Господа, и ныне на мне покажи Твоя обычно щедроты, и лютаго мя избави недуга, изнуряющего душу мою, Дево Богородице, и подаждь ми здравие, яко да непрестанно величаю Тя.
Таже:
Достойно есть яко воистинну блажити Тя Богородицу, присноблаженную и пренепорочную, и Матерь Бога нашего. Честнейшую Херувим, и славнейшую без сравнения Серафим, без истления Бога Слова рождшую, сущую Богородицу Тя величаем.
Чтец: Трисвятое. Пресвятая Троице: Отче наш:
Священник: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.
Лик: Аминь.
И по возгласе, тропари, глас 6
Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.
Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имся Твое призываем.
И ныне: Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианскаго.
По сих же диакон глаголет ектению сию:
Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй, трижды.
Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.
Лик: Господи, помилуй, трижды.
Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.
Лик: Господи, помилуй, трижды.
Прилагает и сия:
Согрешихом и беззаконновахом, сего ради праведный Твой гнев постиже нас, Господи Боже наш, и сень смертная обыде нас, и ко адовым вратом приближихомся, но к Тебе Богу нашему в болезни нашей умильно вопием: пощади, пощади люди Твоя, и не погуби до конца, смиренно молим Ти ся, услыши и помилуй.
Лик: Господи, помилуй, трижды.
Животом и смертию владычествуяй Господи, не затвори в смерти души рабов Твоих, но престани от гнева, и остави ярость, зане исчезают яко дым дние наши, и изсше крепость наша, и погибаем до конца грех ради наших. Милостив буди рабом Твоим, в покаянии со слезами молим Ти ся, услыши и помилуй.
Лик: Господи, помилуй, трижды.
Помяни, яко плоть есмы, Господи, дух ходяй и не обращаяйся, и и милостивно отврати гнев Твой, праведно на ны движимый, имже яко мечем безгодно посецаеши нас: устави болезнь, и утоли язву напрасно губящую нас. Не мертвии бо восхвалят Тя, ниже вси низходящии во ад, но мы живии хвалим Тя, и в болезни сердца стеняще молим Ти ся, услыши и помилуй.
Лик: Господи, помилуй, трижды.
Паче всех согрешихом Тебе, и беззаконновахом, Владыко, и аще покаяния не стяжахом, предложение наше вместо покаяния приими, и на милость преложися, смертоноснаго недуга и болезней лютых яко Всесилен свободи рабы Твоя, болезненно стеняще молим Ти ся, скоро услыши и помилуй.
Лик: Господи, помилуй, трижды.
Не помяни беззаконий и неправд людей Твоих, и не вниди в суд с рабы Твоими, ниже уклонися гневом от рабов Твоих. Аще беззакония назриши Господи, кто постоит; прах бо и пепел есмы, и состав наш яко ничтоже пред Тобою, но яко Щедр и Человеколюбец умилосердися, и не погуби нас во гневе Твоем со беззаконьми нашими, молим Ти ся, Боже Преблагий, услыши и помилуй.
Лик: Господи, помилуй, трижды.
Не хотяй смерти грешных, но еже обратитися и живым быти им, яко живота источник, оживотвори нас праведным Твоим судом смерти достойных: Бог бо еси, живыми и мертвыми обладаяй, и не погуби нас во гневе прещения Твоего, воплем крепким в горести сердца со слезами молим Ти ся, услыши и помилуй.
Лик: Господи, помилуй, трижды.
Милостивно призри, Господи, на озлобление людей Твоих, и умилосердися, и повели Ангелу, простершему руку свою еже погубити всех нас, якоже иногда при Давиде повелел еси, еже доплети ныне и удержати руку свою, да не до конца нас погубит. И мы бо, в покаянии Тебе исповедающеся, яко Давид, вопием: согрешихом и беззаконновахом, и несмы достойны Твоего милосердия, но Ты сам яко Щедр, единаго ради благосердия Твоего умолен быв, покажи милости Твоя древния, и пощади люди, и овцы пажити Твоея, молим Ти ся, скоро услыши и помилуй.
Лик: Господи, помилуй, трижды.
Священник возглас:
Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
Диакон глаголет:
Со умилением паки и паки преклоньше колена, Господу помолимся.
Лик: Господи, помилуй, трижды.
Священник же чтет молитву сию велегласно:
Господи Боже наш, призри с высоты святыя Твоея на молитву нас грешных и недостойных рабов Твоих, беззаконьми нашими Твою благость прогневавших, и благоутробие Твое раздраживших, и не вниди в суд с рабы Твоими, но отврати страшный гнев Твой, праведно на ны движимый, утоли губительное прещение, устави грозный Твой меч, невидимо безгодно секущий нас, и пощади нищих и убогих рабов Твоих, и не затвори в смерти души наша, в покаянии сокрушенных сердцем и со слезами к Тебе Милосердому, Благоуветливому, и Благопременительному Богу нашему припадающих.
Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
Диакон: Премудрость.
Священник: Пресвятая Богородице, спаси нас.
Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.
Священник: Слава Тебе, Христе Боже, упование наше, слава Тебе.
Лик: Слава, и ныне: Господи, помилуй, трижды. Благослови.
Священник же, или архиерей, творит отпуст обычный дне, или праздника.